Thursday, April 20, 2017

تجهيزات المولود الجديد

السلام عليكم ورحمة الله وبركاته


اهلا وسهلا
واخيراً الموضوع الاكثر طلباً والذي طال انتظاره 
(تجهيزات المولود الجديد)


من أكثر الاسئلة اللي طُرحت علي (متى ابدأ اجهز لطفلي؟)
بالشهر السادس هو افضل وقت قبل الثقل وعرفتي بالاغلب جنس البيبي وقبل احتمال الولادات المبكرة لاسمح الله


اذا هذا أول طفل لك
حاولي ماتكثرين اغراض لو نقصك شيْ فالسوق مفتوح
واذا مو أول طفل وعندك اغراض سابقة افرزي اللي عندك وبعدها حددي قائمتك من الاغراض اللي ممكن تحتاجينها



الفرق في قائمة تجهيزي انها تفصيلية وليست مجرد تعداد

----------------------------------------------------------------

اولاً الملابس:
نحرص تكون قطعة وحدة لحد مايلتئم السر وانا افضل اول ستة شهور يكون اللبس قطعة وحدة ويكون قطن 100%
يعتمد اختيار المقاس على حجم الطفل (من وزنه التقريبي في الالتراساوند + حجم البطن+ اوزان الاطفال السابقين)
اذا وزنه 3 كيلو ناخذ مقاس 0-3 اشهر
فاذا حجمه اقل من 3 ناخذ مقاس نيوبورن
واذا خديج ناخذ ملابس tiny baby

وعدد القطع ماراح اذكرها لانه يعتمد على كم مره بتغسلين او اذا عندك مساعدة تغسلها يومي
ولكن المقاسات الصغيرة لاتاخذين اكثر من 6 قطع منها لان المولود بسرعة يكبر ويتغير مقاسه ويكون اللبس وسيع افضل من اللي بالمقاس

والافضل ناخذ افرولات كاملة الازرار تكون من الامام مو خلفية ولا جانبية , ولا يكون لها ابه عند الرقبة تضايق وممكن يمصها الطفل وايضا مالها قبعة
وناخذ شي اكمامه تتقفل لان الطفل بهالمرحلة كثير يجرح نفسه وهالمواصفات دائما القاها في افرولات نكست بالاضافة ان خامته قطن ثقيل يدفي المولود لانه بسرعة يبرد (سبق وجربت محلات كثيرة ونكست هو التوب في الخامة والمواصفات)

والملابس الداخلية:
يفضل تكون بلون ابيض مو ملونة عشان ماتبين تحت الملابس
وهذا النوع wrap style ممتاز للمواليد لسهولة لبسه (من petit Bateau الفيصلية وموجودة هنا في امازون) موجود مثلها كم طويل في سنتر بوينت

وفيه ملابس حسب المواسم اذا شتاء ناخذ ملابس داخلية ثقيلة واذا صيف ناخذ مثلا للبنات شي علاق مايبين تحت اللبس
وهذا يعتمد حسب الموسم وقت الولادة


والقبعات انا احب اخذ للمواليد الـ hospital hat مناسبة لرأس المواليد وتدفيه

صدريات (مريلة) والانواع كثيرة والاختلافات بسيطة بينها

------------------------------------------------------------------------

البطانيات :


من اكثر الاغراض الليي تتوارثها الاجيال
يفضل بطانيات قطنية وناعمة واذا شتاء نختار نوع ثقيل موجود في سنتر بوينت وبوتري بارن واماكن كثيرة
وهي من اكثر الاشياء اللي تتوصخ اذا الطفل على طول في المهاد
والمهادات انصح دائما بالنوع الخفيف اللي مثل الشاش  Aden + Anais لانها لو غطت الببي بإذن الله ماينكتم
وممكن تستفيدين منها كغطاء رضاعة وكغطاء للكارسيت والعربية لو نام البيبي
اخذتها من امازون 
ومنها ايضا بطانيات

فيه ايضا المهاد الشمعي (الشرنقة) اشتريه بكل ولادة ولااستخدمه فمااشوفه مهم من وجهة نظري


------------------------------------------------------------------------

الرضاعة:




انصح دائما وابدا بالرضاعة الطبيعية قدر الامكان كانت نوع رضاعتي لطفلتي exclusive pumping وهو الاصعب
من اكثر الاشياء اللي ساعدتني جهاز الشفط ميديلا + اكياس تخزين الحليب + كريم مرطب للمنطقة + غيارات قطنية للصدر


نتيجة بحث الصور عن ‪avent life factory‬‏
الرضاعات تختلف تجارب الامهات ولكن انصح بالرضاعات الزجاجية اذا الطفل صغير
سواء رضاعات افنت او تومي تيبي او بيجون
واذا كبر نستخدم لها كوفر (استخدم هذا من لرضاعات افنت + او رضاعات LIfe factory وكلهم من امازون)

فرشة الرضاعة استخدم نوع افنت.. واعقم الرضاعات بالطريقة التقليدية موية حارة وملح ماجربت اي جهاز نعقيم

وسادة الرضاعة مريحة للام وموجود انواع كثيرة منها الدائري والنص دائري والمستقيم والبعض يستخدمها من الحمل اثناء النوم

نتيجة بحث الصور عن ‪avent soothie pacifier‬‏
المصاصة, جربت مصاصة افنت اللي قطعة وحدة وهي امن من القطعتين وكثير اطفال يتقبلونها ولينه وصغيرة ومقاس 0-3 لين اكثر من المقاسات الاكبر من امازون ايضا .. جربت اللي على شكل دب للاسف تضايق الفم واقسى

وعلقات المصاصة حبيت الخشبية من زدي (اذا بدأ ينقلب البيبي نغيرها عشان ماتضغط على صدره) وموجود بامازون سيلكون جميلة ولكن ماجربتها


------------------------------------------------------------------------

النوم :

سرير الطفل
انا افضل سلة موسى خلال أول الاشهر لسهولة تنقلها من مكان لمكان ووقت النوم افضل احط السلة داخل سريرالحواجز حق الاطفال وتكفي السلة لحد ثلاثة/ستة شهور
واذا عندك اطفال صغار ماانصح بالقاعدة المتحركة كنوع من الامان
عادة اخذهم من محل الرَبيع (طيبة - رويال مول)

سرير الطفل يجب ان يكون خالي من الوسائد والحواجز وبعض المراتب يكون فيها خاصية التنفس فلو انقلب ماينكتم بإذن الله

------------------------------------------------------------------------

التغيير :
الدايبرز افضل ناخذ نوع مناسب للمواليد (مثل هجيز Pure & Natural قطن عضوي وله فتحة للسر لمقاس المواليد)
مفرش للتغيير وبالنسبة لي استخدم المفارش ذات الاستخدام الواحد اول ماتتوصخ ارميها اخذها من محل المستلزمات الطبية
كريم للمنطقة ويوجد في اي هيرب خيارات متعددة

للشاور: منشفة / مجموعة شامبو اطفال مثلHonest / Shea Moisture / burt's bee , اسفنجة طبيعية و اخر شي حامل للطفل
اختياري ماكان موفق للحامل كان مثل الكرسي وتحته شبك مرات كان يتسكر على بنتي ولا جربت نوع اخر


مقص اظافر صغير (فيه انواع مزودة بمكبر من first years) وفرشة شعر بالنسبة لي شريت مجموعة متكاملة من امازون



------------------------------------------------------------------------


كرسي السيارة ضرورة والانواع كثيرة وانا افضل النوع الملموم اللي ممكن تفكينه ويركب في العربيو او تفكينه ويكون مثل الجلاسة خصوصا بالتنقلات او الزيارات .. اخذت هذا النوع Peg Perego عملي وتقييمي له جداً عالي  من امازون نفس شركة العربية (سبق وتكلمت عنها انستقرام)





جلاسة وقع اختياري المستعجل على جلاسة قراكو Graco Glider Elite Baby Swing واشوفها جدا ممتازة ممكن ارفعها وتكون ارضيه او تكون مثل الكرسي المرتفع وفيها اصوات وهزاز للمقعد نفسه وهزاز زي المرجيحة ودرجات مناسبة لحد 9 شهور حسب ماهو مكتوب .. اخذتها من تويز ار اص

جهاز قياس الحرارة وافضل مقياس حرارة براون





ممكن انتي تحتاجين كرسي الركلاينر recliner chair وهو الافضل بالنسبة لي خصوصا وقت الرضاعة او السهر مع البيبي مريح وملموم



شنطة بيبي واختياري كان skip hop , kipling , wallaroo والخيارات كثيرة حسب حاجتك ماكان يهمني الشكل ابد المهم تشيل وتتحمل



 
الالعاب حسب اختيارك ولكن الزرافة صوفيا جميلة ويحبونها الاطفال كعضاضة وتطلع صوت ومسكتها سهله



شيالة للبيبي (ماسبق واستخدمتها) 



------------------------------------------------------------------------


هذا تقريبا اهم التجهيزات خلال أول ستة أشهر للاطفال المواليد
جعلهم الله من عباده الصالحين وحفظة كتابه الكريم واعاننا على رعايتهم وتربيتهم
والله يرزق كل من يتمنى بالذرية الصالحة


لاتنسوني وذريتي من دعواتكم 
بحفظ الرحمن ... 

2 comments:

  1. يعطيك العافية ماقصرتي ، وانا أأكد على جهاز ميديلا جداً رائع وأحسه من الضروريات فعلاً لكل ام..

    ReplyDelete
  2. ماشاء الله كفيتي ووفيتي 💕 بس عندي اضافة للافادة: للشاور افضل شي استخدمته لعيالي وقت الاربعين الين صاروا يجلسون هو الاسفنجة اللي تجي كاملة تحت البيبي.تمنع انزلاق النونو وتمسكه لك وانتي تدلكينه ورخيصة جدا وماتحتاج فك وتركيب وتخزينها سهل.بس لانها تمتص كل المويه اللي تنزل يبغالها عناية من ناحية التعقيم والتجفيف فقط. انصح فيها جدا جدا خصوصا للامهات الجدد اللي مايعرفون يمسكون البيبي الحديث. صورة لها هنا: http://www.homebargains.co.uk/Handlers/ImageHandler.ashx?id=16869&targetSize=300 .. تلاقونها في اي صيدلية او محل كماليات اطفال

    ReplyDelete