Friday, September 30, 2016

تجربتي مع نادي كتاب الطفل في مكتبة الملك عبدالعزيز وطريقة الاشتراك

نادي كتاب الطفل في مكتبة الملك عبدالعزيز 📚


كثير انسأل عن تجربتي معهم وكيف طريقة الاشتراك 
وطبعا ماكنت اقدر احكم حتى اجربهم وانتهت تجربتي معهم ولله الحمد 



فكرة النادي:
يرسل لك كتب تناسب سن طفلك شهريا ، وبسعر رمزي وكتب كثيرة مو متوفرة دايم بالمكتبات الكبيرة مثل جرير.. حبيت الفكرة مبدئياً وقررت اشترك معهم ️


الاشتراك يشمل:
١-كتابين حسب سن الطفل (احدهم قصصي والاخر غير قصصي مرات يكون تعليمي)
٢- نشاط للطفل مثل اوراق للتوصيل او التصنيف
٣- نشرة تربوية للاهل


اما اهم شي هو
طريقة الاشتراك:
١- يا اما تروحين لاحد الفروع (خريص و المربع) وتسلمين لهم المبلغ واختياراتك من الكتب.
٢- تحويل بنكي وارسال المعلومات عن طريق الايميل. <-- ماجربتها


طريقة الاستلام:
١- من احد فروعهم .
٢- عن طريق البريد السعودي ❌.


سعر الاشتراك:
كانت ٣٠٠ ريال للاشتراك السنوي وصارت 400 


العمر المناسب للاشتراك:
عندهم 4 فئات من 2-15 سنة  
الفئة الأولى: من 2 إلى 5 سنوات
 الفئة الثانية : من 6 إلى 8 سنوات
 الفئة الثالثة: من 9 إلى 12 سنة
 الفئة الرابعة: من 13 إلى 15 سنة



💖 تجربتي: 
انا دخلت موقعهم وطبعت الكتب المناسبة لسن ولدي، واخترت منها ٤٠ كتاب (يرسلون لي من اللي اخترت حسب توفره) .. واخر شي جهزت الاوراق (شهادة ميلاد الطفل + والاوراق + المبلغ) ورحت لفرع خريص وطلبت ان ان استلام الكتب عن طريق الفرع وكل ستة اشهر مو شهري 



طبعا الكتب حلوه واغلبها على اختياري وقريت كم وحده منهم حلوات ومناسبة للعمر المحدد وتستاهل الاشتراك واحس شي حلو كل رأس شهر طفلك يستلم كتاب جديد او تطلعين له كتاب



السلبيات: 
١- رحت لهم يمكن ٣ مرات عشان اشترك لان كل مره يختلف وقت دوامهم فتأكدوا قبل لا تروحون
٢- بعض الكتب حاطين ستكر اسم ولدي فوق اسامي ناس ما استلموا ومااشوفه شي حلو مايخالف لاتعطونا خياراتنا بس اقل شي شيلوها 
٣- ماادري هو سلبي لهم او للبريد السعودي المهم هالبريد مايوصل شي ولا احس انه ثقة
٤- النشاطات اللي مضيفينها احس يبي لها تطوير وتحسين
٥- فيه ناس يشكون من كتب تختلف فيها المعتقدات او التصورات الدينية ، عموما هنا اشوف ان الام لازم تقرأ الكتاب قبل تقرأه لطفلها، انا الحمدلله ماواجهت هالشيء يمكن الفئة العمرية تختلف



باختصار الحمدلله تجربتي معهم اعتبرها حلوة وخيارات الكتب جيدة جداً اقيمها ٨/١٠ .. وانصح اللي تبي تشترك .. تشترك عن طريق الفرع واستلام الكتب كل ستة اشهر ❤


الاستمارة اللي تطبعونها وتعبونها هنا
اما اختيارات الكتب واي معلومة اضافية موجودة هنا 

يوزرهم انستقرام @bookclubkapl ورقمهم 0114347888