تجربتي مع غسالة الصحون

من كثر ما انطلب مني هالموضوع واستفسارات كثيرة حبيت انزله بالتفصيل

باتكلم عن غسالة الصحون او الدش وشر ❤️❤️ 

قبل تشترينها لازم تعرفين:

 -الصحون مايكون فيها بقايا اكل  (سمعت ان تصريف الانواع الجديدة فيه طاحونة تطحن باقي الاكل ويروح مع التصريف"انا احس انظف تشيلينه")

-مو كل المواعين تدخل فيها مثل (الخشب - بعض الترامس والحافظات - بعض القدور المعدن القديمة)

-لها صابون وملح وملمع خاص (بارفق صور لهم)

- تصرف مويه وكهرباء حسب اختيارك لنوع الغسيل

- وحده بس ماتكفي عائلة كبيرة الا اذا شغلوها اكثر من مرة, والعائلة الصغيرة تقدر تجمع مواعين اليوم كله وتشغلها اخر اليوم

- يبي لها ترتيب اذا المواعين كثيرة عشان تتوزع الموية

- الشكل العام بس رفين (بس فيه وحده فيها رف ثالث صغير)

- اذا اشتريتي شيكي جوا اذا فيها مروحتين او ثلاث <بالنسبة لي ثلاث افضل

- اخر واهم شي لازم يكون لها تمديد

ايجابياتها كثيرة منها:

- تعقيم وتجفيف المواعين على طول للدولاب

- اختصار للوقت وراحة لك ولـ يدك

- بعض الانواع فيها ميزة اختيار نص حموله (تغسل لك رف واحد)

- تستغنين عن ملاعق ومواعين البلاستيك واحس اوفر

- القدر اللي لازم اغسله بيدي ارجع احطه فيها لانه بيطلع لي جاف ومعقم

- انواع كثيرة تغسل رضاعات الاطفال وتعقمها

وش ممكن تغسلين فيها غير الصحون:

- الاسفنجة تبع الغسيل

- عيون الفرن

- رفوف الثلاجة لو تدخل

- العاب الاطفال

- فرش الميك اب

- الورد الصناعي اذا يتحمل

- اللي مثلي ادوات الزراعة 

- ممكن تغسلين فيها فواكه او بطاط, بس انا مااسويها 

افضل نوع:

 بالنسبة لي كثير منهم متشابهات ومايفرق الاداء فيهم بس ميزات بسيطة اكثر شي عليه مدح (اريستون- وايرلبول- بوش- ال جي) انا حقتي وايرلبول ولها يمكن ٣ سنوات

اسعارهم: 

الاغلب تبدأ من ١٥٠٠ ريال الى ٣٠٠٠ 

هنا صور بسيطة عن اغراضها

هذا الصابون المكعب (الكل في واحد) ويقوم مكان الصابون والملع وفيه منه بريحة الليمون

طبعا فيه شركات ثانية ولكن انا افضل فنش

-------------------------------------------

هذا صابون بوردة لو ماتوفر المكعبات او كاستخدام اقتصادي اكثر ومنه بعد بريحة الليمون

---------------------------------------------

وهذا الملمع عشان تطلع الاطباق فيها لمعة بعد التجفيف

الغطاء الاحمر او الدائري هذا دائما مكان الملمع, اما اللي ينفتح هذا مكان الصابون سواء بودرة او مكعب

------------------------------------------------------

وهذا الملح وطبعا فيه انواع غير فنش , والبنات لما انقطع قالوا خذوا من محلات المسابح اكثر وارخص توفر بديل بس ماجربت بنفسي

ومكان الملح في اسفل الغسالة مثل الصورة القادمة في اغلب الغسالات

-------------------------------------------

هذا منظف لغسالة الصحون مايستخدم يومي بس كل ماشفتيها تحتاج تنظيف حطي واحد.. وبعد فيه من شركات ثانية بس على شكل اقراص

--------------------------------------------

واخر شي هذا معطر يتعلق على الشبك , ومنه رواح وللاسف توفره قليل في سوبرماركتات السعودية او معدوم

---------------------------------

ومثل ماقلت الشركات تختلف منتجاتها ولكن افضل مافي السوق حاليا فنش وبرل Prill

واتمنى لو جت هالشركة cascade دايم اشوف الاجنبيات يمدحونها لقيت بس البودرة في التميمي

وانصح فيها صراحة سواء عندك خدامة او لا ، اذا جتك عيدية اشتري فيها :) تستاهل قيمتها ❤️

واتمنى وضحت كل شيء ومااستغني عن دعواتكم الحلوة ❤️