أهلا ياجميلات
اليوم بـ اطرح موضوع عن أكثر الصور انتشراً لي :$
وانتشرت فقط كـ صورة بدون تفاصيل
اليوم باخذكم بجولة صغيرة لطيفة في كورنر الغسيل البسيط
بالبداية كان جدار فاضي وكنت احتاج مكان يرتب لي اغراض الغسيل
وكلها مالها مكان كل وحده منثورة بجهة وللأسف ماعندي غرفة خاصه بهالشيء :(
فكرت ان الارفف افضل مكان لمساحيق الغسيل .. بعيداً عن الاطفال
وبعد الارفف فكرت افصل دولاب تحت بحجم سلال الغسيل
واما حامل طاولة الكوي هذا وقعت في حبه وحسيته يجمع كل الاشياء بمكان واحد
مستعدين نبدأ ؟
يالله بسم الله
هذا حامل طاولة الكوي, اعجبت انهم اهتموا بإدق التفاصيل مثل مكان سلك المكوا
هذا الحامل من امازون هنا وسعره 12$ , وسبق وجربت حامل ايكيا للاسف غير جيد ولا فيه مقارنة بينهم
هذا دولاب جانبي . للتخزين ومافيه اي مساحيق او مواد خطرة
هنا بشكل أوضح .. اول رف للاندري باق او اكياس الغسيل , وثاني رف لكفرات طاولة الكوي , وثالث واحد لمناشف التمسيح
هنا استخدمت بوكسات للمساحيق اولا عشان تحفط الريحة وثانيا اعرف الكمية المتبقية وثالثا اجمل شكل
وكتبت على كل بوكس محتواه (واحد اريال للملابس البيضاء) و (واحد تايد للملابس الملونة)
البوكسات : من دنيا الأسعار (حي الفلاح - شارع عثمان بن عفان - الرياض)
استخدمت تيب الطباشير والقلم للكتابة وله استخدامات كثيرة من هنا (انستقرام: curioartsupplies)
هنا حبيت اضيف لمسات بسيطة ومفيدة مثل ارشادات التعامل مع البقع
تقدرين تطبعينهم من هنا (فيه الوان ثانية وافتحيه عن طريق كمبيوتر) ,وارشادات البقع من هنا , اخذتهم وطبعتهم وغلفتهم حراري عشان لو لاسمح الله جاها مويه ماتخرب
الفريمات الصغيره: ايكيا
الفريم الكبير مقاسه A4: دايسو
كلمة لاندري من أمازون هنا , سعرها ب9$ تقريبا
واستخدمت مثل هذا لتعليق الملابس المكوية او المعاليق الزايدة , وميزته لو ماتحتاجينه ينرفع على فوق ويتسكر
*نصيحة: اي معاليق زايدة طلعيها لاتجمعين شيْ ماتحتاجينه (تقدرين ترسلينها لأي مغسلة ملابس)
شريتها من موقع امازون هنا , حبتين منها ب10$
وهذي لوحة خشبية للي مو حابه تعلق على الجدار ومره حلوة الوانها واضافت لون للمكان
من (انستقرام: patterns_sa )
واخر شي هنا بوكس صغير حطيته لاقلام التنظيف او قلم كتابه او اي شي ممكن احتاجه
اتمنى عجبتكم التفاصيل
ولو عجبكم شي اذكروا اسم الله عليه
وصغر المكان يولد الابداع ومو عذر للحوسة ابد
ولو كان المكان اكبر استغلي كل زاويه فيه
ديمة
.jpeg)
.jpeg)
.jpeg)