الفرق في قائمة تجهيزي انها تفصيلية وليست مجرد تعداد
----------------------------------------------------------------
اولاً الملابس:
نحرص تكون قطعة وحدة لحد مايلتئم السر وانا افضل اول ستة شهور يكون اللبس قطعة وحدة ويكون قطن 100%
يعتمد اختيار المقاس على حجم الطفل (من وزنه التقريبي في الالتراساوند + حجم البطن+ اوزان الاطفال السابقين)
اذا وزنه 3 كيلو ناخذ مقاس 0-3 اشهر
فاذا حجمه اقل من 3 ناخذ مقاس نيوبورن
واذا خديج ناخذ ملابس tiny baby
وعدد القطع ماراح اذكرها لانه يعتمد على كم مره بتغسلين او اذا عندك مساعدة تغسلها يومي
ولكن المقاسات الصغيرة لاتاخذين اكثر من 6 قطع منها لان المولود بسرعة يكبر ويتغير مقاسه ويكون اللبس وسيع افضل من اللي بالمقاس
والافضل ناخذ افرولات كاملة الازرار تكون من الامام مو خلفية ولا جانبية , ولا يكون لها ابه عند الرقبة تضايق وممكن يمصها الطفل وايضا مالها قبعة
وناخذ شي اكمامه تتقفل لان الطفل بهالمرحلة كثير يجرح نفسه وهالمواصفات دائما القاها في افرولات نكست بالاضافة ان خامته قطن ثقيل يدفي المولود لانه بسرعة يبرد (سبق وجربت محلات كثيرة ونكست هو التوب في الخامة والمواصفات)
والملابس الداخلية:
يفضل تكون بلون ابيض مو ملونة عشان ماتبين تحت الملابس
وهذا النوع wrap style ممتاز للمواليد لسهولة لبسه (من petit Bateau الفيصلية وموجودة هنا في امازون) موجود مثلها كم طويل في سنتر بوينت
وفيه ملابس حسب المواسم اذا شتاء ناخذ ملابس داخلية ثقيلة واذا صيف ناخذ مثلا للبنات شي علاق مايبين تحت اللبس
وهذا يعتمد حسب الموسم وقت الولادة
والقبعات انا احب اخذ للمواليد الـ hospital hat مناسبة لرأس المواليد وتدفيه حطيت صورة للمقارنة مع مصاصة والقبعة السفلية هي الحجم الموجود في الاسواق
صدريات (مريلة) والانواع كثيرة والاختلافات بسيطة بينها .. النوع السادة اللي في الصورة من تومي تيبي وحلوة للمواليد ، اما الموردة اللي معها عضاضة تناسب اللي يسننون اكثر 👍🏻 كلهم موجودات في ممزورلد (كود الخصم Dem10)
------------------------------------------------------------------------
البطانيات :
من اكثر الاغراض اللي تتوارثها الاجيال
يفضل بطانيات قطنية وناعمة واذا شتاء نختار نوع ثقيل موجود في سنتر بوينت وبوتري بارن واماكن كثيرة
وهي من اكثر الاشياء اللي تتوصخ اذا الطفل على طول في المهاد
هالبطانية رائعة من سنتربوينت ناعمة وتكد كد اشتريها من اول طفل لي 👍🏻 وبكل تجهيز ارجع اشتريها سعرها حلو وناعمة ومرتب شكلها جدا وكل عيالي يحبونها ومنها الوان ودرجات تناسب الاولاد والبنات
انصحكم فيها😍
والمهادات انصح دائما بالنوع الخفيف اللي مثل الشاش Aden + Anais لانها لو غطت البيبي بإذن الله ماينكتم
وممكن تستفيدين منها كغطاء رضاعة وكغطاء للكارسيت والعربية لو نام البيبي
ومنها ايضا بطانيات ومناشف ومريلة (جربت المريلة حجمها كبير جدا فماتناسب الا ٦ شهور و فوق)
فيه ايضا المهاد الشمعي (الشرنقة) اشتريه بكل ولادة ولااستخدمه فمااشوفه مهم من وجهة نظري .. ومافيه مثل التجربة ممكن ترتاحين عليه 👌🏻
طريقة لف المولود بطريقة آمنة (لاحظوا المهاد يدخل تحت اليد👍🏻)
افضل غسل الملابس في بداية الشهر التاسع واستخدم
هالصابون لغسيل ملابس المواليد 👍🏻
------------------------------------------------------------------------
الرضاعة:
انصح دائما وابدا بالرضاعة الطبيعية قدر الامكان كانت نوع رضاعتي لطفلتي الاولى exclusive pumping وهو الاصعب
ومكملات ادرار الحليب ساعدتني كثير بمولودتي الثانية 👍🏻😍♥️ الحمدلله وكتبت عنه موضوع مُفصل هنا
الرضاعات تختلف تجارب الامهات ولكن انصح بالرضاعات الزجاجية اذا الطفل صغير
سواء رضاعات افنت او تومي تيبي او بيجون
فرشة الرضاعة استخدم نوع افنت.. واعقم الرضاعات بالطريقة التقليدية موية حارة وملح ماجربت اي جهاز تعقيم
هالعلبة جدا رائعة وانصح فيها وتبقى لك 😍 ومرتبة في الطلعات او لبيت الأهل او في السفر اشتريتها لبنتي الاولى ومازلت للان استخدمها بعد فرشة جديدة من هنا
وسادة الرضاعة مريحة للام وموجود انواع كثيرة منها الدائري والنص دائري والمستقيم والبعض يستخدمها من الحمل اثناء النوم وبعد استخدمتها بعد ماجلست بنتي تسند ظهرها 💖😍
المصاصة, جربت مصاصة افنت اللي قطعة وحدة وهي امن من القطعتين وكثير اطفال يتقبلونها ولينه وصغيرة ومقاس 0-3 لين اكثر من المقاسات الاكبر من امازون ايضا .. جربت اللي على شكل دب للاسف تضايق خشم الطفل واقسى
وعلقات المصاصة طلبتها من علي اكسبريس سيلكون بالاسم 👌🏻😍وبعدين تنفع عضاضة، شحن مباشر وسعرها مايوصل ٤٠ ريال هنا
------------------------------------------------------------------------
النوم :
سرير الطفل
انا افضل سلة موسى خلال أول الاشهر لسهولة تنقلها من مكان لمكان ووقت النوم افضل احط السلة داخل سريرالحواجز حق الاطفال وتكفي السلة لحد ثلاثة/ستة شهور
واذا عندك اطفال صغار ماانصح بالقاعدة المتحركة كنوع من الامان
عادة اخذهم من محل الرَبيع (طيبة - رويال مول)
سرير الطفل يجب ان يكون خالي من الوسائد والحواجز وبعض المراتب يكون فيها خاصية التنفس فلو انقلب ماينكتم بإذن الله
تحديث٢٠٢١: جربت سرير نكست تو مي للامانة حلوة فكرته وانه يرتفع من جهة وحده فمناسب للاترجاع ولكن مايناسب فوق عمر ٥ شهور ممكن يطيح منه الطفل لو سند يده على الحواجز.. انا فادني وقت النفاس فقط😅
------------------------------------------------------------------------
التغيير :
الدايبرز افضل ناخذ نوع مناسب للمواليد (مثل هجيز Pure & Natural قطن عضوي وله فتحة للسر لمقاس المواليد)
مفرش للتغيير وبالنسبة لي استخدم المفارش ذات الاستخدام الواحد اول ماتتوصخ ارميها اخذها من محل المستلزمات الطبية
كريم للمنطقة ويوجد في اي هيرب خيارات متعددة
تحديث2021: افضل شي جربته لمنطقة الحفاظ (زيت جوز الهند من أرض الطبيعة واضيف له نقط من زيت الشاي للتعقيم والتطهير)
واداة وضع الكريم ممتازة وناعمة مهمتها تحافظ على الكريم وماتوصخ يدك ولو احد يغير له غيرك يستخدمها بدون مايلمس المنطقة بيده 👍🏻 من امازون والحجم الصغير افضل لان له علبة ونمسحها بالوايبز بعد كل استخدام من هنا
اختياري ماكان موفق للحامل كان مثل الكرسي وتحته شبك مرات كان يتسكر على بنتي ولا جربت نوع اخر
تحديث2021: اقتنيت شاور من stokke XL ممتاز جدا ويتسفط بعد الاستخدام ويجي معه قطعة اضافية للمواليد الجدد ما احتجتها (الحجم العادي متوفر في موقع ممزورلد كود الخصم Dem10)
مقص اظافر صغير (فيه انواع مزودة بمكبر من first years) وفرشة شعر بالنسبة لي شريت مجموعة متكاملة من امازون
------------------------------------------------------------------------
كرسي السيارة ضرورة والانواع كثيرة وانا افضل النوع الملموم اللي ممكن تفكينه ويركب في العربيو او تفكينه ويكون مثل الجلاسة خصوصا بالتنقلات او الزيارات .. اخذت هذا النوع Peg Perego عملي وتقييمي له جداً عالي من امازون نفس شركة العربية (سبق وتكلمت عنها انستقرام)
ومره حلو وممتاز ويناسب من الولادة لـ٣٦ كيلو تقريبا ١٠ سنوات
تحديث 2021: افضل تاخذون انواع اجدد مثل اللي تلف لجهة الباب
او الانواع اللي سهل تنربط بخاصية isofix
جلاسة وقع اختياري المستعجل على جلاسة قراكو Graco Glider Elite Baby Swing واشوفها جدا ممتازة ممكن ارفعها وتكون ارضية او تكون مثل الكرسي المرتفع وفيها اصوات وهزاز للمقعد نفسه وهزاز زي المرجيحة ودرجات مناسبة لحد 9 شهور حسب ماهو مكتوب .. اخذتها من تويز ار اص
والان استخدمها لبنتي الثانية 👍🏻 وتحبها مره
جهاز قياس الحرارة وافضل مقياس حرارة براون
تحديث2021: محل روعة الوتد والمستلزمات الطبية في الرياض تبيعه ب٢٠٠ ريال الاصدار الجديد ، فرق عن اسعار الصيدليات
ممكن انتي تحتاجين كرسي الركلاينر recliner chair وهو الافضل بالنسبة لي خصوصا وقت الرضاعة او السهر مع البيبي مريح وملموم
تحديث2021: اللي عندي حاليا من باك كومفرت ومريح جداً وصناعته امريكية
شنطة بيبي
واختياري كان skip hop , kipling , wallaroo والخيارات كثيرة حسب حاجتك ماكان يهمني الشكل ابد المهم تشيل وتتحمل
الالعاب حسب اختيارك ولكن الزرافة صوفيا جميلة ويحبونها الاطفال كعضاضة وتطلع صوت ومسكتها سهلة.. وانتبهوا اثناء غسيلها مايدخل الماء داخل اللعبة ويكون مكان خصب لنمو البكتيريا والعفن
تحديث 2021: وهاللعبة الجميلة من Iherb ماتوقعت ابد تجذب المواليد اكثر شي حمسني عليها الريفيوات انها تعجب الصغار وفعلا بعد التجربة تستاهل 👍🏻 (كود اي هيرب WTH769)
شيالة للبيبي (ماسبق واستخدمتها)
------------------------------------------------------------------------
هذا تقريبا اهم التجهيزات خلال أول ستة أشهر للاطفال المواليد
جعلهم الله من عباده الصالحين وحفظة كتابه الكريم واعاننا على رعايتهم وتربيتهم
والله يرزق كل من يتمنى بالذرية الصالحة
لاتنسوني وذريتي من دعواتكم
