تجربتي مع غسالة الصحون

من كثر ما انطلب مني هالموضوع واستفسارات كثيرة حبيت انزله بالتفصيل

باتكلم عن غسالة الصحون او الدش وشر ❤️❤️ 

قبل تشترينها لازم تعرفين:

 -الصحون مايكون فيها بقايا اكل  (سمعت ان تصريف الانواع الجديدة فيه طاحونة تطحن باقي الاكل ويروح مع التصريف"انا احس انظف تشيلينه")

-مو كل المواعين تدخل فيها مثل (الخشب - بعض الترامس والحافظات - بعض القدور المعدن القديمة)

-لها صابون وملح وملمع خاص (بارفق صور لهم)

- تصرف مويه وكهرباء حسب اختيارك لنوع الغسيل

- وحده بس ماتكفي عائلة كبيرة الا اذا شغلوها اكثر من مرة, والعائلة الصغيرة تقدر تجمع مواعين اليوم كله وتشغلها اخر اليوم

- يبي لها ترتيب اذا المواعين كثيرة عشان تتوزع الموية

- الشكل العام بس رفين (بس فيه وحده فيها رف ثالث صغير)

- اذا اشتريتي شيكي جوا اذا فيها مروحتين او ثلاث <بالنسبة لي ثلاث افضل

- اخر واهم شي لازم يكون لها تمديد

ايجابياتها كثيرة منها:

- تعقيم وتجفيف المواعين على طول للدولاب

- اختصار للوقت وراحة لك ولـ يدك

- بعض الانواع فيها ميزة اختيار نص حموله (تغسل لك رف واحد)

- تستغنين عن ملاعق ومواعين البلاستيك واحس اوفر

- القدر اللي لازم اغسله بيدي ارجع احطه فيها لانه بيطلع لي جاف ومعقم

- انواع كثيرة تغسل رضاعات الاطفال وتعقمها

وش ممكن تغسلين فيها غير الصحون:

- الاسفنجة تبع الغسيل

- عيون الفرن

- رفوف الثلاجة لو تدخل

- العاب الاطفال

- فرش الميك اب

- الورد الصناعي اذا يتحمل

- اللي مثلي ادوات الزراعة 

- ممكن تغسلين فيها فواكه او بطاط, بس انا مااسويها 

افضل نوع:

 بالنسبة لي كثير منهم متشابهات ومايفرق الاداء فيهم بس ميزات بسيطة اكثر شي عليه مدح (اريستون- وايرلبول- بوش- ال جي) انا حقتي وايرلبول ولها يمكن ٣ سنوات

اسعارهم: 

الاغلب تبدأ من ١٥٠٠ ريال الى ٣٠٠٠ 

هنا صور بسيطة عن اغراضها

هذا الصابون المكعب (الكل في واحد) ويقوم مكان الصابون والملع وفيه منه بريحة الليمون

طبعا فيه شركات ثانية ولكن انا افضل فنش

-------------------------------------------

هذا صابون بوردة لو ماتوفر المكعبات او كاستخدام اقتصادي اكثر ومنه بعد بريحة الليمون

---------------------------------------------

وهذا الملمع عشان تطلع الاطباق فيها لمعة بعد التجفيف

الغطاء الاحمر او الدائري هذا دائما مكان الملمع, اما اللي ينفتح هذا مكان الصابون سواء بودرة او مكعب

------------------------------------------------------

وهذا الملح وطبعا فيه انواع غير فنش , والبنات لما انقطع قالوا خذوا من محلات المسابح اكثر وارخص توفر بديل بس ماجربت بنفسي

ومكان الملح في اسفل الغسالة مثل الصورة القادمة في اغلب الغسالات

-------------------------------------------

هذا منظف لغسالة الصحون مايستخدم يومي بس كل ماشفتيها تحتاج تنظيف حطي واحد.. وبعد فيه من شركات ثانية بس على شكل اقراص

--------------------------------------------

واخر شي هذا معطر يتعلق على الشبك , ومنه رواح وللاسف توفره قليل في سوبرماركتات السعودية او معدوم

---------------------------------

ومثل ماقلت الشركات تختلف منتجاتها ولكن افضل مافي السوق حاليا فنش وبرل Prill

واتمنى لو جت هالشركة cascade دايم اشوف الاجنبيات يمدحونها لقيت بس البودرة في التميمي

وانصح فيها صراحة سواء عندك خدامة او لا ، اذا جتك عيدية اشتري فيها :) تستاهل قيمتها ❤️

واتمنى وضحت كل شيء ومااستغني عن دعواتكم الحلوة ❤️

العاب حركية ممتعة

لكثرة الطلب والاقبال قررت اكتب الموضوع هنا 

(العاب حركية ممتعة)

منها يبقى لفترة ويستفيدون منه ولان الموضوع متشعب

بس نقطة أولى مهمة فيه انشطة بديلة ماتكلفك الا ورق اي فور 

واللي تبي تسوي نشاطات المادة او المشوار مو عائق .. نوعي بين العاب وبين انشطة ورقية او حركية لو بالمراكي, ماضرنا 

لان اغلب الالعاب صراحة غالية ومو شرط تمتلكينها كلها بس قد يناسبك وحده منها والباقي لا

مثلا اجمعي العيديات حقاته واشتري لعبة او مثلا اشتريها هدية لمناسبة معينة مرة بالسنة او مرتين بالكثير

فالانشطة واللعب يحتاج أم تساعد اطفالها وتحاول تفكر معهم وتدور افكار جديدة والاطفال مايقصرون بخيالهم الواسع

الالعاب اللي باعرضها كلها مجربتها واللي عليها اسمي تصويري 

وكلها بعد حركية ممتعة واعتبرها بديل عن الاجهزة 

واشوف انها مره حلوة وتستاهل سعرها لانها لك وللزمن بتعيش لعيالك ولاحفادك بإذن الله

واغلب الالعاب قد قريت عنها او شفت عند احد انها جلست اكثر من 20 سنة ومازالت سليمة وبعضها يلعبون فيها عيالهم

باختصار تتوارثها الاجيال.. 

وبعد تذكرت كلها امريكية من little tikes -  step2

طبعا بالاضافة للالعاب الخشبية مع انها مرات تضيع مثل melissa and doug - ikea

نبدأ بالالعاب الصيفية الخارجية الحلوة 
اولا : لعبة الموية بس وانا افضلها منفصلة عن لعبة التراب عشان ماتنقلب الدنيا طين وحفلة 
اسمها :Little Tikes Spiralin' Seas Waterpark Play Table

العمر المناسب: سنتين - 6 سنوات

مكان الشراء: العاب الحسين

السعر: 300 أو 290 

فيديو للتوضيح --> هنا 

مره حلوة واقل شي يلعب فيها الطفل حوالي ساعة وتفريغها جدا سهل ويكفي انها تلطف الجو في الحر و

كل جزء فيها فيها فكرة او لعبة معينة ومرات اضيف لعبة ببلز وارفعها وتمتلي الدنيا فقاعات صابون 

ثانيا: لعبة التراب ومره حلوة  لدرجة جالسة حوالي شهرين اطارد وراها .. فيها مميزات جداً اولا لها غطاء مايدخلها حشرات ثانيا منفصلة مافيها مويه ابد . ثالثاً نوع التربة المستخدم رمل شاطيئ طبي عادي حتى لو انوكل ونظيف مرررره وكل فترة اضيفي له موية , الرمل من التعليم المبكر الكيس ب25 ريال وهي تحتاج تقريبا ستة اكياس حسب اذا تبينها مليانة او لا, وفيه منها كراب احمر من ستيب تو متوفر بعد في التعليم المبكر وسعره اغلى من السلحفاة وبعد ممكن تملينها موية بدال التراب
اسمها : Little Tikes Turtle Sandbox

العمر المناسب: سنة - ست سنوات وانا اشوف اكثر الى تسعه ممكن
مكان الشراء: العاب الحسين
السعر: 299 ريال
صور للتوضيح --> هنا 



اللعبة الثالثة: واشوف انها مست هاف اذا بتشترين لولدك او بنتك سيارة خلاص اشتري هذي ومره حلوة وكل ماشريتيها وهو صغير كل ماحللها اكثر ومره حلو ومشهورة جدا وتعيش لك بس طبعا لاتترك في الشمس عشان ماتتغير الوانها, وتقدرين تشترين معها زي محطة البنزين صغير للي تبي تكمل الكولكشن, وبعد فيه حجم اكبر للاطفال الاكبر عمر شكلها مثل الشاحنة
  اسمها: Little Tikes Cozy Coupe

العمر المناسب:  1 ½ -5 سنوات
مكان الشراء: العاب الحسين واغلب الالوان متوفرة فيها ..وبعد مرات في تويز ار اص بس قليلة
السعر: 350 -600 حسب الحجم واللون 
صور للتوضيح --> هنا


اللعبة الرابعة: سيارة وتتزحلق او قطار الموت بس حق صغنونين ماادري وش اسمها بس جداً ممتعة .. ومره حلوة طولها ثلاثة متر تحتاج فقط مساحة في النهاية وامنة الدرج الجاني مايزحلق ومو رفيعة ومره حلوة تجي معها سياراتها وبعض الصغار يقلبونها لسياراتهم الصغيرة , فيه مثلها توماس بس مو موجودة في السعودية
اسمها: Step 2 Up & Down Roller Coaster

العمر المناسب: سنتين - لخمس سنوات
مكان الشراء: العاب الحسين
السعر: 399 
صور للتوضيح --> هنا 



اللعبة الخامسة والاخيرة: زحليقة ومرجية مع بعض , او زحليقة منفصلة وكلهم عندي بس باختلاف المكان.. ميزة اللي مع بعض حلوة لاكثر من طفل 

طبعا باختلاف الشكل بس مره حلوات وتكرف وينبسطون فيها الضيوف الصغار بس غالبا تحتاج ملاحظة ماتتركينهم لحالهم
سعرها مااعرف لانها جت هدية , اما الزحليقة لحالها اظنها ب400 او 300 نسيت



هذا اللي يحضرني و اعجبني من الالعاب الحركية ذات الحجم الكبير وفيها اكثر حاطتهم في الوش لست ,, مثلا بيت كبير ونحط فيه مطبخ
وبعد للي عندها اطفال تحت السنتين تشوف هاللعبة هنا مره حلوة بس مؤقتة بعد ثلاث سنوات مااظن بتستخدم, موجودة الاخيرة في التعليم المبكر سعرها 449 واشوفها رخيصة مقارنة باللي جواتها
وبعد هذي عاجبتني هنا ومره حلوة تناسب عمر سنتين ل15 سنة حسب ماهو مكتوب بس للاسف ماقد شفتها
ومليان مليان العاب بس شوفي ميول طفلك واذا يقدر خليه هو يختار بنفسه 


وبالاخير ارجع اعيد مايهم كم لعبة او بكم بتشترين, المهم الطفل ينشغل بشيء مفيد ويستكشف ويلعب ويتحرك بس من تجربتي هذي افضل الالعاب اللي اشوف طفلي متعلق فيها ونادر مايطفش منها 


اتمنى لكم يوم نشيط سعيد 

طريقة عمل الصلصال في المنزل بدون مواد ضارة

أهلا 

اليوم موضوعنا نشاط طفولي وجميل جدا للمشاركة مع الاطفال

التراب والصلصال من افضل الانشطة اللي تنمي عضلات اليد لدى الطفل ولتفريغ الطاقة لديهم وطبعا ينمي الخيال والابتكار

طبعا الصلصال المنزلي خيار جيد للاطفال الصغار خوفاً عليهم من لمس او اكل المواد الضارة,

وايضا لمن يحب اللعب بالصلصال بشكل دائم أو لصنع لون مميز غير متوفر في الاسواق

الطريقة جداً سهلة

واخذتها من ام دانة صفا safa__q وهي اخذتها من حنين ihaneen

واشكرهم على هالطريقة الحلوة 

المقادير:

1 كوب دقيق

1 كوب مويه

نص كوب ملح البحر (اخذته من التميمي من شركة ارض الطبيعة) وهو يساعد في حفظ الصلصال لمدة اطول

3 ملاعق كبيرة زيت ولو شفتيها تلصق بيدك زيدي الكمية

ملعقة كبيرة ترتار (موجود في الدانوب والتميمي وانا شريته من امازون هنا)

وبعد مانعجن نحتاج الوان طعام (موجودة دائما بقسم الكيك)

قفاز او قلفز للعجن

علب بلاستيك او اكياس اللحم والساندوتش الصغيرة للحفظ 

الطريقة:

نخلط المواد السائلة اولا , ثم نضيف كوب الدقيق وعلى نار خفيفة حتى تتماسك

بعدها نتركها شوي تبرد ونجهز العلب والالوان

نقسمها حسب حاجتنا انا قسمتها 7 اقسام قد العلب تقريبا

وكل قسم اضيف له نقطة ملون واعجن فيه لحد مايتماسك

طبعا الالوان الاساسية

احمر

اخضر

ازرق

اصفر <ممكن نسويه بصفار الزعفران

ابيض <مانضيف له اي شي

اسود <احمر+ازرق كثير

بنفسجي < احمر+ازرق بكمية متساوية

برتقالي <اصفر +احمر

وردي < نقطة خفيفة احمر

وعلبتها كل وحده لحالها 

ولو كيستيها فرغيها من الهواء ويفضل حفظها بمكان بارد

وبالعافية على اطفالكم ووقت ممتع لكم ولهم 

آلة الطباعة Label Maker

السلام عليكم 

البوست اليوم للبنات المرتبات 

عن آلة الطباعة الليبل ميكر 

وكثير كثير تكلمت عنها لدرجة اني اتوقع كثير ملوا من هالموضوع

بس بصراحة من أكثر الاشياء اللي ندمت على أيامي بدونها 

هذي هي آلة الليبل ميكر شي جميل يرتب وينظم لك اغراضك هو زي طابعة الستكر تكتبين اسم الشي اللي تبينه وتقصينه وتلصقينه على اغراضك . . ويجي معه التيب منه ابيض وشفاف وملون وشي ينور في الظلام وشي تكوينه ويلصق على الملابس (مره حلو لاغراض وملابس الاطفال اللي في الروضة بس من شركات مختلفة) وتقدرين تضيفين بعض الايقونات وفريمات وحتى فيه خطوط مختلفة . تقدرين تكتبينه على بهاراتك والعاب ولدك او على الكتب او اذا بغيتي تسوين هدايا لطفلك تكتبينه اسمه وتطبعينه او لترتيب البوكسات استخداماته لا محدودة انتي وابداعاتك.

.

جهازي من شركة brother

ايجابيات جهازي:

- يكتب عربي وانجلش

-ماخذ اعلى ريت في امازون بس ميزة حقي الكتابة بالعربي

-احلى شيء فيه التحكم بالخط واحجام الشريط والوان الشريط فيه شي شفاف وابيض واسود واغلب الالوان

-الشريط (الستكر والحبر سوا) مايخلص واحد قبل الثاني

-له شنطة حافظة

-يشتغل بالبطارية او بالكهرباء

- الستكر يتحمل الحرارة والموية وماتتقطع 

.

سلبيات جهازي:

- اكبر حجم ١٢ مم وفيه اجهزة تكتب اكبر منه

-مو كل اشرطة الكتابة متوفرة في الرياض يوجد الاساسيات وسعر كل شريط ٥٠ ريال طوله ٨ متر

.

اتمنى افدتكم شفت في جرير بس مايكتب عربي وماادري اذا متوفر في مكان ثاني او لا 

وهذي صور لبعض استخداماتي له:

  ترتيب الملابس حسب النوع والمقاس

الكتابة على التوزيعات

  

 على البهارات باللغتين العربية والانجليزية

 على العلب المتشابهة

 تخزين المواد الغذائية

 على الادوات الشخصية (ممكن استخدامها للتفريق بين ادوات الاطفال)

 على فولت الكهرباء

 على بوكسات ملابس الشتاء

تصنيف الارفف حسب محتوياتها

استخداماتها كثيرة جدا لاحصر لها

وتظهر قيمتها الحقيقية بعد اقتنائها 

واتمنى لكم يوم مرتب منظم جميل 

ماذا احتاج لـ أزرع في منزلي ؟

الزراعة المنزلية في احواض (اوعية - اصيص) 

كثير تجيني استفسارات عن هالموضوع 

وبإذن الله ماتخلص التدوينة الا وكل الاسئلة مجاوب عليها

انا فقط محبة لهالمجال ولاني اشوف فيه جمال وسعادة وبساطة

وممتع جداً سوا وقت اختيار النبتات او زراعتها او سقيها او اخيراً قطف ثمارها

والفشل في أول وثاني محاولة لايعني الاستسلام

بالعكس هي تجارب فادتني وبتفيدك كثير بهالمجال

ومازال عندي نباتات تموت خصوصا بحر الصيف

بس هذا مايخليني استسلم بالعكس ادور الحلول عشان تعيش معي اكثر

بالبداية الزرع بشكل عام يحتاج إلى اساسيات

1- تربة

2- ضوء الشمس

3- ماء

4- وفي حالتنا وعاء

..................................................................

1- التربة الزراعية وهي الافضل للأحواض (هالنوع مناسب للزراعة داخل وخارج المنازل)

الكيس سعره 20 ريال - من اي مشتل

ويوجد ايضا تربة المانية موجود في التميمي وبنده بس صغير وسعره اغلى وماانصح فيه

* ممكن خلط سماد عضوي مع التربة

البذور او الشتلات

البذور: متوفرة في بعض السوبرماركتات الكبيرة قسم الزراعة مثل كارفور والتميمي وبعد في ساكو وبعض المشاتل سعرها بين 4-8 ريال لكل ظرف (ركزي على المعلومات الخلفية مثل وقت الزراعة ووقت القطف) ماتحتاجين كل الكمية اللي في الكيس احفظي الباقي منها في مكان جاف

الشتلات: تاخذينهم من المشاتل 

2- ضوء الشمس

حسب النبته واحتياجها في نباتات خارجية تتحمل الشمس والحرارة في الشتاء بس ماتتحمل بالصيف (يفضل تسألون صاحب المشتل عن تحمل كل نوع)

وفيه مثل الورد ابد مايتحمل, فنصيحتي لكم اختاروا مكان مناسب تحت الشبابيك او ظل او جوا البيت قريب من نور الشباك

3- الماء

اهم شي التربة ماتصير جافة ولا رطبة ماتشرب الماء

ولكن الري غالبا في الشتاء مره يوميا وفي الصيف مرتين يوميا

ووقت الري يكون صب بتوزيع وليس صب مندفع على التربة

4- الاحواض (الاوعية - الاصيص)

اختاري الشكل واللون اللي تحبينه بس يفضل يكون شوي مرتفع عشان الجذور (فوق 10سم)

واختاري الحوض اللي في اسفله فتحات صغيرة لخروج الزائد من الماء

الادوات الزراعية (مو اساسية ولكن يفضل تكون عندك)

الحبوب الزرقاء اللي على اليمين هذي مثل الفيتامينات والمغذيات للزرع ومره حلوة فرق معي في النباتات اشتريتها من المشتل

اما اللي جنبها هذي نفس الشيء اخذتها بس من ماليزيا للتجربة فقط وموجود بساكو نفس هالفكرة ولكن ماجربته

طريقتها (كل شهر او شهرين تحطين كمية تختلف بحسب طول وحجم الزرعة عند ساق النبتة)

اذا اول مره خلي صاحب المشتل يزرعها قدامك وتعلمي منه

وخذي حوض واحد أو اثنين كبداية وحاولي يكون شتلة عطرية اسهل في العناية (نعناع-مرمية-اكليل الجبل-ريحان) 

وبامكانك انتي تزرعينها بنفسك اذا توفرت المواد السابقة 

ولكل نبته لها تحمل معين من الماء والشمس والحرارة فتحتاجون مراجع بسيطة

 وبالاخير أنا مبتدئة وحابة هالمجال ودايم اسأل اصحاب الخبرة (مثل اصحاب المشاتل, والاكاونتات المهتمة بهالمجال)

ودايم نحاول نبتعد عن النباتات السامة والمواد او المبيدات السامة والضارة والخطرة

وان شاء الله التدوينة شرحت لكم ابسط واسهل الطرق للزراعة

والموضوع جداً سهل وغير مكلف فقط يحتاج عناية بسيطة

مقابلها نمتع اعيننا وانفسنا بالطبيعة واللون الاخضر ومحصوداتنا

اتمنى لكم يوم اخضر سعيد

ديمه

تغريسات للزرع

أهلا 

تدوينة خفيفة لطيفة وسريعة عن تغريسات الزرع 

اكتشفت كثير بنات يحبون الزراعة بس مايعرفون كيف يزرعون وبعضهم يشوفونها شغله مو ناعمة :D

وانا اشوفها قمة الانوثة وخصوصا لو أضفتي عليها لمساتك الحلوة

وممكن تطبقينه على اي شيْ في المطبخ او مكتبك

استخدمت:

تغريسات خشب فاضية من قسم الزراعة في دايسو

تيب طباشير من (انستقرام curioartsupplies)

قلم طباشيرمن (انستقرام curioartsupplies)

مقص

الطريقة بديهيه قصي بالحجم المناسب واكتبي اسم الزرعة

انا احب اطبقها على البذور وممكن تضيفين تاريخ البذر وتعطي شكل جميل

وايضا ممكن تستخدمين مقص مشرشر 

وهنا النتيجة

وبأي عمل دنيوي حلو نغير نيتنا لنؤجر على هالعمل  

* قال النبي صلى الله عليه وسلم : (ما من مسلم يغرس غرسا أو يزرع زرعا فيأكل منه إنسان أو بهيمة إلا كان له به صدقة)

* قال النبي صلى الله عليه وسلم : (إن قامت الساعة وفي يـد أحدكم فسيلة فإن استطاع أن لا تقوم حتى يغرسهـا فليغرسها) .

ديمة